Монголын тусгаар тогтнолыг доромжлоход амархан ажээ

Эрдэнэтийн уулын бая­жуулах үйлдвэр байгуу­лагд­саны 30 жилийн ойн баярын өдөр нижгэр гэгч нь болж өнгөрлөө. Нижгэр тэмдэг­лэхээс ч аргагүй том бүтээн байгуулалт, Монголын төс­вийг гол бүрдүүлэгч үйлдвэр гэдэг утгаар нь хөл хөөртэй баярыг нь ойлгож болох юм. Уг ойн баярын ажиллагаанд манай томчууд, дарга сэтэрт­нүүд бүгд л шахам очсон. Очих нь яахав. Харин тэр үйл ажиллагааны үеэр хачирхаж харамсаад барамгүй нэг яв­дал болсныг дурдахгүй бай­хын аргагүй.

ОХУ-аас манай улсад суугаа Онц бөгөөд Бү­рэн эрхт Элчин сайд А.Б.Го­ворин үг хэлсэн бөгөөд үүнийг нь хэн нэгэн орчуулагч огт хэлмэрчилсэнгүй.

Манай ал­баны хүмүүс ч эх хэл дээрээ сонсч буй мэт хүлээн авч, толгой дохин алга ташиж байлаа. А.Б.Говорин Оросынхоо харьяаны Буриад ч юм уу, Халимагт ирээд үг хэлж байгаа биш. Тэр тусгаар тогтносон Монгол Улсад ал­баны үйл ажиллагаанд орол­цож байгаа учраас бид ярианых нь утга санааг эх хэл дээрээ хүлээн авч ойлгох ёстой гэсэн энгийн логик л энд байх байсан юм. Дарга даа­мал нарын орос хэлтэй нь тэндээ л биз, албан ёсны үйл ажил­лагаа тусгаар Монгол Улсад орос биш монгол хэл дээр явагдах ёстойд л бүх учир нь байна.

Ер нь бүрэн эрхт Элчин сайдууд тухайн улсын­хаа хэлээр ярьдаг, албан ёсны үйл ажиллагаанд усыг нь уусан газрынхаа хэлээр ярьдаг жишиг бий. Японд суугаа манай Элчин сайд П.Жигжид, Францад суугаа манай Элчин сайд Р.Алтан­гэрэл нарыг тэр нутгийнхаа хэлээр ус цас шиг ярьж бай­хыг харахад бахархмаар л байдаг юм. Гэхдээ Эрхүүд амбан захирагчаар ажиллаж байгаад Монголд Онц бөгөөд Бүрэн эрхт Элчин сайдаар томилогдсон А.Б.Говорин хэ­мээх эрийг монголоор ярина гэж найдаад хэрэггүй биз, тэгэх ч шаардлагагүй. Харин эрхэм Элчин сайд албан ёсны орчуу­лагчгүй ирлээ гэхэд уг арга хэмжээг зохион байгуулж байгаа манайхан энэ бүгдийг нь зохион бай­гуулах ёстой байв. Монголын тусгаар тогт­нолд халдаж, төрийг дором­жилсон энэ явдал гарахад хүргэсэн албан тушаалтнууд арай сийрэгхэн шиг бол сайн дураараа ажлаа өгөх байсан биз. Эрдэнэтийн уулын бая­жуулах үйлдвэр байгуу­лагд­саны 30 жилийн ойн баярыг зохион байгуулах үйл ажил­ла­гаан дээр ийм харамсалтай явдал гарахад хүргэсэн дарга Б.Ганзориг, салбарын сайд Д.Зоригт нар болж өнгөрсөн хэрэг явдлын төлөө огцорсон ч болох юм.

Хоёр орны найрамдал, хамтын ажиллагааны тухай ойлголт бол тусдаа зүйл. Орос, монгол хүүхдүүд гүйл­дээд цэцэг навчаа барьж, хоёр орны ард түмний хамтарсан бүтээн байгуулалт гэдэг та­лаас нь ойн баяраа суртал­чилж үзүүлж бололгүй яахав. Харин харь хэл дээр нэг орос нөхөр яриад л, манай бүхий л дарга даамлууд нь чухам ойлгоод л баярлаж алга та­шаад л. Харин түүнийг нь улс даяар шууд нэвтрүүлэхийг үзсэн энгийн иргэд чухам ямар оронд амьдарч байна хэмээн эргэцүүлэхэд хүрсэн гэж өөр зуураа ярьж байна. Тусгаар тогтнолд халдаж, улс гүрнийг доромжлоход амар­хан ажээ. Доромжлуулж бай­гаагаа мэдэхгүй хүмүүс төр засагт нь байвал бүр ч амар юм байна.